काठमाडौं- नेकपा एमालेको भातृ संगठन युवा संघले वर्तमान सरकार र नेकपा एमालेविरुद्ध घेराबन्दी भएको भन्दै काठमाडौंमा प्रदर्शन गरेको छ ।
आइतबार काठमाडौंको बानेश्वरमा युवा संघल सरकारले संविधानअनुसार नै काम गर्दा पनि घेराबन्दी पार्न खोजिएको भन्दै विरोध प्रदर्शन गरेका हुन् ।
प्रदर्शनमा सहभागीहरुले आइएम वीथ केपी ओली, ‘स्वतन्त्र न्यायपालिकाको सम्मान गरौं, संविधानको कार्यान्वयन गरौं’, ’संवैधानिक सर्वोच्चता कायम गरौं, व्यवस्था विरोधी कदम बन्द गरौं’ लगाएतका प्लेकार्ड बोकेका थिए ।
त्यस्तै सहभागीले ’आजलाई होइन भोलिलाई १० वर्ष ओलीलाई’, ’कानुनी शासन कायम गरौं’, ’बौद्धिक अराजकताको अन्त्य गरौं’ लगायतका नारा लगाएका थिए ।
त्यस्तै आइतबार नै एमाले निकट खेलकुद महासंघले लिम्पियाधुरा, लिपुलेक र कालापानी समेटिएको चुच्चे नक्सा, संविधान र ओलीको डमीसहित आइतबार प्रदर्शन गरेका छन् ।
काठमाडौंको त्रिपुरेश्वरमा गरिएको प्रदर्शनका क्रममा केपी ओलीको पक्षमा नारावाजी गरेका थिए । खेलकुद महासंघका अध्यक्ष रमेश पौडेलले सरकारलाई असफल बनाउने काम भएको र मुलुकमा अराजक अवस्था सिर्जना गर्न खोजिएको भन्दै खवरदारी गरिएको बताए ।
एमाले निकट संगठनले जनताको सार्वभौमसत्ताको रक्षा र बिपक्षी गठबन्धनको असंवैधानिक तथा राष्ट्रघाती कदमका विरुद्ध निरन्तर प्रदर्शन गर्ने जनाएका छन् ।
आजै बिपक्षी गठबन्धननिकट विद्यार्थी संगठनले सरकारविरुद्ध प्रदर्शन गरेका छन् । उनीहरुले सरकारको क्रियाकलाप असंवैधानिक भएको भन्दै काठमाडौंका शंक फुकेर विरोध प्रर्दशन गरे । प्रतिनिधिसभा विघटन, पेट्रोलियम पदार्थको मूल्यवृद्धि र भ्रष्टाचारविरुद्ध उनीहरुले आन्दोलन गरेका हुन् ।
