काठमाडौं । प्रकाश सपूत एक नेपाली गायक, सङ्गीतकार, मोडल र अभिनेता हुन्, जो नेपाली लोक सङ्गीतमा आफ्नो योगदानका लागि परिचित छन्। उनै गायक सपूतले अब फिल्म ‘वसन्त’ बनाउने भएका छन् ।
गलबन्दी प्रोडक्सनको ब्यनरमा निर्माण हुने यस फिल्मलाई सपूत आफैले अभिनय, निर्माण र निर्देशन गर्न लागेका छन् । उनको यो पहिलो निर्देशकिय डेब्यु फिल्म हो ।
आइतबार एक प्रत्रकार सम्मेलनको आयोजना गरिँदै टिजर सार्वजनिक गरेर घोषणा गरिएको फिल्मको कथा प्रकाश स्वयंले नै लेखेका हुन् । फिल्ममा संगीत पनि उनैकै रहने छ । आफ्नो सङ्गीतको माध्यमबाट सामाजिक र राजनीतिक चेतना जगाउनका लागि परिचित सपूतको पहिलो निर्देशकीय फिल्म कस्तो रहन्छ भन्ने चासो धेरैमा देखिएको छ ।
फिल्ममा सपूतको जोडीका रुपमा नायिका स्वस्तिमा खड्का छिन् । उनीहरुले यसअघि ‘जाले रुमाल फाट्यो’ र ‘कुरा बुझ्नु पर्छ’ गरी दुई गीतको भिडियोमा सहकार्य गरेका थिए । अब, उनीहरू ठूलो पर्दामा पनि पहिलो सहकार्य गर्न लागेका हुन् ।
अभिनयलाई निरन्तरता दिने योजनामा रहेका सपूतको यस अघि अघिल्लो वर्ष फिल्म ‘परदेशी २’ प्रदर्शन भएको थियो । यो उनको डेब्यु फिल्म थियो । पहिलो फिल्मबाटै सफलताको स्वाद चाखेका उनी हालै अनुबन्धित भएको फिल्म ‘पूर्ण बहादुरको सारङ्गी’मा पनि काम गर्ने तयारीमा छन् ।
आगामी दशैंपछि छायांकन गर्ने तयारी गरिएको फिल्म ‘बसन्त’का कार्यकारी निर्माता मोहन विश्वकर्मा, अनुरोध भट्टराई र नेन्सि शेरचन हुन् भने सह-निर्देशक सुनिल वि.क हुन् ।
सपूतका गलबन्दी च्यातियो, तिम्रो मायाले मलाई पीर दियो, कुरा बुझ्न पर्च, सकम्बरी, दमाई महाराज लगायतका गीतहरू चर्चित छन्। यि गीतले सामाजिक चेतनामूलक सन्देश दिएका छन्।
