काठमाडाैं । नेपालले भारतसँग सम्बन्धित केही निर्णय गर्ने बित्तिकै त्यसले भारतीय मिडियामा अरु बेला नपाएको कभरेज पाउँछ । यो भारतको विरुद्धमा हुनुपर्दैन, नेपालको पक्षमा भए मात्र पनि पुग्छ ।
सत्य, तथ्य र सन्तुलन सामान्यतः भारतीय मिडियाका लागि त्यति प्राथमिकतामा पर्दैनन्, त्यसमाथि भारतसँग सम्बन्धित अन्य देशका विषय परे भने त अधिकांश भारतीय मिडियाले आफू मिडिया भएको नै भुल्छन् र केवल भ्रम प्रसार गर्छन् ।
हालै नेपाल सरकारले नेपाली १०० रुपैयाँको नोटमा चुच्चे नक्सा राख्ने निर्णय गरेपछि भारतीय मिडियाले त्यस्तै रूप देखाउन थालेका छन् । नोटमा कालापानी, लिपुलेक र लिम्पियाधुरासहितको चुच्चे नक्सा राख्न लागेको विषयले भारतीय मिडियामा हङ्गामा नै मच्चिएको छ । नेपालले भारतीय भूमिमाथि दादागिरी देखाएको आसयका साथ उनीहरू प्रस्तुत भइरहेका छन् ।
एबीपी न्यूजले यसमा चीनको षड्यन्त्र देखेको छ । उसले स्पष्टरूपमा भनेको छ, ‘भारतीय भूमिसहितको नक्सा नेपाली नोटमा राख्ने कुरामा चीनले समर्थन गरेको छ ।’
कतिपयले यसलाई इन्टरनेट अवरुद्ध भएको विषयमा पनि जोडिरहेका छन् ।
अन्य धेरै मिडियाहरूले भारतीय विदेशमन्त्री एस जयशंकरको प्रतिकृया प्रसारण गरेर नेपालले गलत गरेको पुष्टि गर्ने प्रयत्न गरिरहेका छन् । जयशंकरले यस विषयमा नेपालको एकपक्षीय निर्णय भएको र त्यसले धरातलीय यथार्थमा कुनै बदलाव नल्याउने प्रतिकृया दिएका थिए ।
नेपालको संसद्ले २०७७ जेठ ७ मा नै चुच्चे नक्सा पास गरेको थियो । यसैअनुरूप हुनेगरी नेपालले १०० रुपैयाँ नेपाली नोटमा सो नक्सा राख्ने निर्णय गरेको हो ।
सम्बन्धित समाचार
नोटमा चुच्चे नक्सा छाप्ने निर्णय : राष्ट्रवादी कार्ड कि सत्ता जोगाउने अस्त्र ?
