नेपाल विद्युत प्राधिकरणका कार्यकारी निर्देशक कूलमान घिसिङ देशमा पर्याप्त विद्युत उत्पादन भएकोले स्वदेशमै खर्चिन विभिन्न योजनाहरू अगाडि सारिएको बताएका छन् ।
साइट भिजिटको सिलसिलामा शनिवार रुपन्देही आइपुगेका घिसिङले प्राधिकरण देशमै विद्युत खपत गराउने योजनामा जुटेको बताएका हुन् ।
‘अहिले हामीलाई चाहिएको भन्दा ४०० मेगावाट विद्युत उत्पादन भइरहेको छ,’ घिसिङले भने, ‘इन्डक्सन कुकिङ, इलेक्ट्रिक भेइकल योजना देशमा अगाडि सार्नुपर्नेछ । इलेक्ट्रिक भेइकल चार्ज गर्न देशमा ५० प्रमुख ठाउँमा चार्जिङ सेन्टर बनाउँदै छौं । अब विद्युतको बढी प्रयोग गरौं, ग्यास र पेट्रोलियम पदार्थको कम प्रयोग गरौं ।’
उनले ठूला उद्योगहरूलाई चाहे जति विद्युत उपलब्ध गराउन प्राधिकरण तयार रहेको स्पष्ट पारे । परासी, सुनवल क्षेत्रका ठूला उद्योगलाई १३२ केभीए प्रसारण लाइन दिइने बताए । उनले तत्काल खपत गर्न सक्ने उद्योगलाई १३३ केभीए प्रसारण लाइन पनि प्राधिकरणले उपलब्ध गराउन सक्ने बताए ।
घिसिङले विद्युत विस्तार तथा संरचना निर्माणमा ऐन, कानून नै बाधक भएको गुनासो समेत गरे । विभिन्न ऐन नियमका कारण काम गर्न समस्या हुनुका साथै लागत समेत वृद्धि हुने गरेको गुनासो गरे ।
एक्सटेन्सन लाइन विस्तार गर्न ‘राइट अफ वे’का लागि वन क्षेत्रहरूमा जग्गा अधिग्रहण प्रक्रिया लामो र जटिल हुँदा समयमै योजनाहरू सम्पन्न गर्न नसकिने अवस्था रहेको उनको भनाइ छ ।
‘वन क्षेत्रमा रुख काट्नका लागि मन्त्रीस्तरको निर्णय हुनुपर्यो । उक्त प्रक्रियामा पुग्दासम्म एक–डेढ वर्ष लाग्छ । स्वीकृति लिएर आउँदासम्म त्यहाँ रहेका रुखहरू पनि ठूला भइसकेका हुन्छन् । फेरि रिकाउन्ट गर्न पर्यो । यो प्रक्रिया नै अति जटिल हुँदा काम गर्न गाह्रो छ,’ घिसिङले भने ।
उनले देशका प्रमुख शहरहरूमा भूमिगत तार बिछ्याउने अभियान पनि थालिएको बताए ।