नेकपा माओवादी केन्द्रका अध्यक्ष पुष्पकमल दाहाल प्रचण्डले पुँजी बजारको लगानीलाई साम्राराज्यवादको विकसित रुप भएको बताएका छन् । उनले औद्योगिक क्षेत्रमा लगाउनुपर्ने पुँजीलाई शेयर बजारमा लगाउनु साम्राराज्यवादको विकसित रुप भएको बताएका हुन् ।
शनिबार माओवादी केन्द्रको सबै प्रदेशको सम्मेलनलाई काठमाडौंबाट एकैसाथ उद्घाटन गर्दै प्रचण्डले पछिल्लो समय पुँजीको लगानी उद्योग र उत्पादनका क्षेत्रमा हुन छाडेर पुँजी बजारमा लगानी भइरहेको बताए ।
एकाधिकार पुँजीवाद र संशोधनवाद जोडिएर वित्तीय एकाधिकार पुँजीवादमा भूमण्डलीकृत पुँजीवाद बन्दै गएको भन्दै प्रचण्डले यसलाई निस्तेज गर्ने गरी पुँजी बजारको विषममा पार्टीको दस्तावेजमा नै समावेश गर्ने योजना रहेको सुनाए ।
उनले शेयर बजारप्रति लक्षित गर्दै पहिले पहिले पुँजीको लगानी उद्योग र उत्पादनका क्षेत्रमा हुने गरेको तर, अहिले लगानी पुँजी वा दोश्रो बजारमा हुनु वित्तीय पुँजीवादको विशेषता भएको बताए । उनले नेपाल लगायत विश्वभर नै पुँजीको लगानी धितोपत्र, सट्टा बजार, आईएमएफ, विश्व बैंक र एसियाली बैकहरुमा हुने गरेका बताए ।
प्रचण्डले विश्वभर नै यो क्षेत्रमा पुँजी लगानी बढ्दै गएकाले यसको अध्ययन अनुसन्धान र विश्वलेशण गर्नु जरुरी भएको बताए । उनले यस प्रकारको विकृतीको विष्लेशण गरेर लड्ने तरिका खोज्ने अभिभारा माओबादीमाथि आएको बताए ।