काठमाडौं–कांग्रेस वरिष्ठ नेता रामचन्द्र पौडेलले पार्टी पुनर्जागरणका लागि भन्दै सात बुँदे दृष्टिकोण अघि सारेका छन्। नेता पौडेलले सोमबार सामाजिक सञ्जालमार्फत् आफ्नो दृष्टिकोण अघि सारेका हुन् ।
सभापति शेरबहादुर देउवाले पार्टीलाई गति दिन नसकेको भन्दै रूष्ट बन्दै आएका पौडेलले पार्टी एकताका आधार न्याय, पारदर्शी मूल्याङ्कन र निष्पक्षता भएको बताएका छन् ।
यस्ता छन् पौडेलका ७ बुँदे दृष्टिकोण
१. ‘निमुखालाई न्याय र विपन्नलाई आय’ साकार पार्न कर्मशील कांग्रेसको निर्माण गर्नुपर्ने भन्दै वरिष्ठ नेता पौडेलले सैद्धान्तिक विचलन नभएको र फराकिलो राष्ट्रवादी विचार पार्टीमा आवश्यक रहेको बताएका छन् ।
२. लोकतान्त्रिक समाजवाद उत्पादनमुखी अर्थनीति, गाउँमुखी विकास, जनमुखी शासन र युवा केन्द्रित रोजगारी सिर्जना गर्दै श्रमको सम्मान गर्ने संस्कृति हुनुपर्ने पनि पौडेलले बताएका छन् । एकीकृत सामाजिक सुरक्षा र सार्वजनिक दायित्व वहन गर्ने गतिशील निजी क्षेत्र हुनुपर्ने पौडेललेको दृष्टिकोण छ ।
३. अर्को बुँदामा नेता पौडेले बहुआयामिक वातावरण मैत्री पर्यटन र प्रतिस्पर्धी बजारसँग गाँसिएको उद्योग–व्यवसाय हुनुपर्ने बताएका छन् ।
४.स्वच्छ पानी, हावा र खुला मैदानसहितका सुरक्षित बस्तीहरु आजको आवश्यकता रहेको बताउँदै स्थानीय रोजगारी र आम्दानी, सबैलाई गुणस्तरीय शिक्षा र गुणस्तरीय स्वास्थ्य सेवा, सुरक्षा र सम्मानसहित गाउँको मौलिक चरित्र झल्काउने आधुनिक नगर आवश्यक रहेको पनि पौडेलले बताएका छन् ।
५. सत्तरी वर्षको संघर्षबाट प्राप्त बहुलवादमा आधारित संसदीय समावेशी प्रणालीको जगेर्ना गर्नुपर्ने पनि पौडेलले बताएका छन् । उनका अनुसार मौलिक हक र विधिको शासनको प्रत्याभुति, भ्रष्टाचार विरुद्ध कठोर संघीय सुशासन, बारम्बार नयाँ प्रयोगको निरुत्साहन, निरन्तर क्रमिक सुधारको मार्ग प्रशस्त गर्ने पद्धति अपनाउनु पर्छ ।
६. सामाजिक–धार्मिक सद्भावका सन्दर्भमा समाजका हरेक समूहबीच सहकार्य गर्नुपर्ने र सनातनदेखि चलिआएको धर्म, परम्परा र संस्कृतिको संरक्षण गर्नुपर्नेमा पौडेलले जोड दिएका छन् ।
७.परराष्ट्र सम्बन्धका सम्बन्धमा पनि आफ्ना दृष्टिकोण राख्दै नेता पौडेलले नेपालको अखण्डता र स्वाभिमानको रक्षा, बलियो अर्थ–कुटनीतिक अभ्यास, भाइचारामा आधारित असंलग्न नीति हुनुपर्ने बताएका छन् ।
