काठमाडौं । सल्यानमा बुधबार भएको बस दुर्घटनामा परी घाइते भएका एक जनाको उपचारका क्रममा बुधबार राति मृत्यु भएको छ ।
बुधबार बिहान करिब ११ बजेतिर दाङबाट रुकुम जाँदै गरेको यात्रुवाहक बस दुर्घटनामा परी गम्भीर घाइते भएका तुलसीपुर उपमहानगर ४ निवासी ४६ वर्षीय विकको उपचारका क्रममा मृत्यु भएको हो ।
उनको राप्ती प्रादेशिक अस्पताल तुलसीपुरमा मृत्यु भएको जिल्ला प्रहरी कार्यालय सल्यानका प्रहरी नायब उपरीक्षक नवीन कार्कीले जानकारी दिए । दाङबाट पूर्वी रुकुमतर्फ जाँदै गरेको रा १ ख २०८५ नम्बरको यात्रुवाहक बस सल्यान बाघचौर नगरपालिका २ ठिनबाङ्ग खोलाको पुलबाट खसेको थियो । विक सोही दुर्घटनाग्रस्त बसका बस धनी हुन् ।
बस दुर्घटनामा परी २२ जना घाइते भएका थिए । तीमध्ये गम्भीर घाइते चार जनालाई कोहलपुर अस्पताल पठाइएको थियो । अरु घाइतेको दाङमा उपचार भइरहेको छ ।
दुर्घटनामा परी गम्भीर घाइते रहेका तीन जना यात्रुको हाल शिक्षण अस्पताल कोहलपुरमा उपचार भइरहेको छ । सामान्य घाइते भएका अधिकांश उपचारपछि घर फर्किसकेका छन् ।