नेकपा एमालेको विधान महाधिवेशनमा सहभागी भएका प्रतिनिधिहरूले अबको अध्यक्ष पनि केपी शर्मा ओली नै बनाउने गरी सर्वसम्मत नेतृत्व चयन गर्नुपर्ने सुझाव दिएका छन् ।
शुक्रवारदेखि ललितपुरको गोदावरीमा शुरू भएको विधान महाधिवेशनमा प्रस्तुत गरिएको संशोधित विधानमाथि भएको छलफलमा आगामी महाधिवेशनबाट हुने नेतृत्व चयन पनि सर्वसम्मत हुनुपर्ने धारणा बहुमत प्रतिनिधिहरूबाट आएको हो ।
नेतृत्व सर्वसम्मत चयन गर्न बरू पदाधिकारीको संख्या बढाउनुपर्ने धारणा उनीहरूले राखेका छन् । मङ्सिर १० देखि १२ गतेसम्म काठमाडौँमा हुने महाधिवेशनमा अध्यक्षका रूपमा ओलीले पुनः आफ्नो आकांक्षा देखाएका छन् ।
गत मंगलवार राष्ट्रिय मिडियाका सम्पादकहरूसँग अन्तरक्रिया गर्दै ओलीले आफूले दोहोर्याएर कक्षा नपढ्ने भएपनि अध्यक्षभन्दा माथि अर्को कक्षा नभएकाले आफू अध्यक्षको आकांक्षी भएको बताएका थिए ।
एमालेको विधान संशोधन गर्ने क्रममा ७० वर्षे उमेरहद कायम गर्नुपर्ने, अध्यक्षसहित १३ बाट बढाएर २१ पदाधिकारीको व्यवस्था गर्नुपर्ने, पार्टी विभाजनको असर कम गर्दै लैजानुपर्ने र अन्य पार्टीबाट आएका नेता कार्यकर्ताको व्यवस्थापनमा जोड दिनुपर्ने माग उठेको छ ।
शनिवार ६ समूह बनाइ छलफल गरिएको थियो । ५ समूहले हिजै आफ्नो राय सुझाव दिएका छन् भने आइतवार एउटा समूहले आफ्नो सुझाव दिँदैछ । समूहले दिएको सुझाव र सोधेको प्रश्नको जवाफ आज अध्यक्ष ओलीले दिने कार्यक्रम रहेको छ । त्यसपछि विधान महाधिवेशन सम्पन्न हुनेछ ।
विधान महाधिवेशनका लागि अध्यक्ष ओलीले राजनीतिक प्रतिवेदन, महासचिव ईश्वर पोखरेलले संगठनात्मक प्रतिवेदन र उपमहासचिव विष्णु पौडेलले संशोधित विधान प्रस्तुत गरेका थिए ।
देशै भरिबाट आएका करीब ६ हजार प्रतिनिधिहरूको ६ समूह बनाएर छलफल गरिएको थियो ।
ओलीनिकट एक प्रतिनिधिले भने – ‘आगामी महाधिवेशनपछि पनि पार्टी र देशलाई अध्यक्ष ओलीकै खाँचो छ । त्यसैले हामीले विधान महाधिवेशनमार्फत नै सर्वसम्मति जुटाएर दशौँ महाधिवेशनको नेतृत्व छनौट गर्न सुझाव दिएका छौं ।’
प्रतिनिधिका रूपमा पूर्व माओवादीका नेता कार्यकर्ता गरी ५ सय ३२ र एमालेका तत्कालीन नेता माधवकुमार नेपालको पक्षमा रहेका २ हजार भन्दा बढी सहभागी छन् ।