नेकपा एमालेका अध्यक्ष केपी शर्मा ओलीले सोमवार राति एक वक्तव्य जारी गर्दै आफ्ना नेता तथा कार्यकर्तालाई एकताको पक्षमा उभिन आग्रह गरेका छन् ।
सरकारले संसदको चालू अधिवेशन अन्त्य गरेर दल विभाजन अध्यादेशमार्फत एमाले विभाजन गर्न षड्यन्त्र गरेको आरोपसहित उनले सबैलाई विभाजनविरुद्ध उभिन आग्रह गरेका हुन् ।
‘केही समययता एमाले र अन्ततः नेपाली कम्युनिस्ट आन्दोलनलाई नै विभाजित गर्ने र समाप्त पार्न खोज्ने गम्भीर षड्यन्त्र भैरहेको हामी सबैले भोगिरहेका छौं,’ ओलीले वक्तव्यमा भनेका छन्, ‘पूर्व घोषित प्रतिबद्धता विपरित प्रतिनिधि सभाको चालू अधिवेशन हठात् अन्त्य गरेर राजनीतिक दल विभाजनसम्बन्धी अध्यादेश ल्याउने र नेकपा एमालेलाई विभाजित गर्न षड्यन्त्र गरिँदैछ ।’
ओलीले नेकपा एमाले र यस पार्टीको संसदीय दलमा विभाजन गर्ने कुनै पनि बहाना वा षड्यन्त्र पार्टीका लागि मान्य र क्षम्य हुन नसक्ने बताएका छन् ।
‘पार्टीका सम्पूर्ण नेता, कार्यकर्ता र प्रतिनिधि सभा तथा राष्ट्रिय सभाका माननीय सदस्यहरूलाई पार्टी वा संसदीय दल विभाजनका प्रयासहरू विरुद्ध दृढताका साथ उभिन हार्दिक अपील गर्दछु,’ ओलीले वक्तव्यमा भनेका छन् ।
