काठमाडौं । प्रतिनिधिसभाको बैठकमा राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले ज्ञानेन्द्र शाहलाई ‘राजा’ भनेर सम्बोधन गरेपछि विवाद भएको छ । नेपालगन्जको घटनालाई लिएर पूर्वराजा शाहका गतिविधिमाथि निगरानी गर्न माग गरिएकोमा लिङ्देनले विरोध जनाउँदै ‘राजा ज्ञानेन्द्रको गतिविधिमाथि किन प्रश्न ?’ भन्ने शैलीमा अभिव्यक्ति दिएका थिए ।
लिङ्देनले प्रतिनिधिसभामा ज्ञानेन्द्र शाहलाई ‘राजा’ भनेर सम्बोधन गरेपछि विवाद भएको हो ।
“केही साथीहरूले राजावादीहरू धार्मिक सद्भाव बिथोल्न लागेका छन् त्यसलाई निगरानी गर्नुपर्यो। राजा ज्ञानेन्द्र पनि लोकतन्त्र विरोधी गतिविधिमा संलग्न भएका छन् उनको गतिविधिमा ध्यान दिनुपर्यो भनेर आग्रह र अनुरोध गरे। कुन त्यस्तो गतिविधि रहेछ राजावादीहरूको जसले धार्मिक सद्भाव बिथोल्न लागेको छ ?”, लिङ्देनले भनेका छन्, “राजा ज्ञानेन्द्रको कुन गतिविधि रहेछ जसले लोकतन्त्रलाई अवरूद्ध गरिरहेको छ त्यसको जानकारी लिन चाहन्छु। त्यसबारे प्रष्ट पार्न साथीहरूलाई आग्रह गर्दछु।”
माओवादी केन्द्रका सांसद लेखनाथ दाहालले लिङ्देनको भनाई रेकर्डबाट हटाउन माग गरे । संविधानले कुनै राजालाई नचिनेको भन्दै संविधान बाहिरको अभिव्यक्ति स्वीकार्य नहुने बताए ।
“नेपालको संविधानले राजा चिन्दैन। भर्खरै एक जना माननीय सदस्यले राजा शब्द प्रयोग गर्नुभयो। यो संघीय लोकतान्त्रिक गणतन्त्रात्मक मुलुक हो, राजा भन्ने शब्द रेकर्डबाट हटाइयोस्”, उनले सभामुखलाई भने।
