काठमाडौंको कलंकीमा टिपरको ठक्करबाट मोटरसाइकलमा सवार एक युवकको मृत्यु भएको छ। शनिबार राति भएको दुर्घटनामा अर्का एक जना गम्भीर घाइते भएका छन् ।
बा ४ ख ६८४३ नम्बरको टिपरले बा १ ब ५४०१ नम्बरको मोटरसाइकललाई ठक्कर दिएको प्रहरीले जनाएको छ ।
महानगरीय प्रहरी वृत कालिमाटीका डीएसपी अपिलराज बोहराले दुर्घटनामा एक जनाको मृत्यु भएको र एक घाइते भएको बताए । मृत्यु हुनेमा बझाङको थलारा घर भइ ललितपुर बस्दै आएका २४ वर्षीय बसन्त विष्ट रहेका छन् ।
गम्भीर घाइते भएका विष्टको शहिद मेमोरिल अस्पतालमा उपचारका क्रममा मृत्यु भएको हो भने अर्का बझाङकै चैनपुरका २६ वर्षीय निखिल बम घाइते भएका छन् ।
उनको राष्ट्रिय ट्रमा सेन्टरमा उपचार भइरहेको छ । टिपर चालक र टिपरलाई प्रहरीले नियन्त्रणमा लिएको जनाएको छ ।