यही मङ्सिर २७ देखि २९ सम्म काठमाडौँमा आयोजना गर्न लागिएको नेपाली कांग्रेसको महाधिवेशनका सन्दर्भमा धेरैको चासो रामचन्द्र पौडेल समूहमा छ । सभापतिका लागि संस्थापन पक्षबाट शेरबहादुर देउवा र विमलेन्द्र निधि लगायतका नेताहरू दौडमा छन् ।
संस्थापनइतर पक्षबाट रामचन्द्र पौडेल, डा. शेखर कोइराला, प्रकाशमान सिंह, डा. शशांक कोइराला लगायतका नेताहरू आफूलाई सभापतिको आकांक्षी बताउने गरेका छन् तर साझा उम्मेदवार भने तय गर्न सकेका छैनन् ।
सभापतिका लागि साझा उम्मेदवार खोज्न बुधवार संस्थापनइतर समूहको बैठक बस्दैछ । गौशालास्थित अनुपम फूडल्याण्डमा आज पौडेलले आफूनिकट जिल्ला सभापति, पूर्वजिल्ला सभापति, क्षेत्रीय सभापतिलगायतका नेता कार्यकर्तासँग सुझाव माग्ने कार्यक्रम रहेको छ ।
महाधिवेशनका लागि केही दिनमात्र बाँकी रहेको छ । तर देउवाविरुद्ध अहिलेसम्म कसैले पनि उम्मेदवारी दिएको छैन । विमलेन्द्र निधिले महिना दिनअघि उम्मेदवारी घोषणा गरिसकेका छन् । उनी देउवानिकट नेता हुन् ।
सभापतिको साझा उम्मेदवार खोज्न हिजो पनि नेता प्रकाशमान सिंहनिवास चाक्सीबारीमा बैठक बसेको थियो । बैठकमा वरिष्ठ नेता पौडेलले साझा उम्मेदवार खोज्न नसक्ने हो भने आफूलाई मौका दिन आग्रह गरेका थिए ।
‘तपाईंहरु मिल्न तयार भए, म छोड्न तयार छु । हैन भने मलाई नै सघाउनुस्,’ नेता पौडेलले बैठकमा भनेका थिए ।
पौडेल आफैं पनि सभापतिका आकांक्षी हुन् भने शेखर र शशांक कोइरालाले पनि सभापति बन्ने आफ्नो महत्त्वाकांक्षा देखाएका छन् । तर साझा उम्मेदवारको अहिलेसम्म टुंगो लागेको छैन ।
मंगलवार बैठक बसिरहेका बेला कार्यकर्ताहरूले नेता सिंहको निवासबाहिर प्रदर्शन गरेका थिए । तत्काल साझा उम्मेदवार बनाउनुपर्ने माग गर्दै गेटबाहिर उनीहरू जम्मा भएका थिए ।
यसैबीच कांग्रेसका युवानेताहरूले सभापतिको साझा उम्मेदवार बनाउन नसके आफैंले प्यानल घोषणा गर्ने चेतावनी दिएका छन् । धनराज गुरुङ, गगन थापा लगायतका नेताहरूले आफ्ना शीर्ष नेताहरूमाथि सभापतिको साझा उम्मेदवार खोज्न निरन्तर दबाब दिइरहेका छन् ।
