नेकपा एमालेका अध्यक्ष केपी शर्मा ओलीले विघटित कार्यदलका सदस्यहरूलाई बोलाएर माधवकुमार नेपाललगायतका नेताहरूलाई कुर्न नसकिने ब्रिफिङ गरेका छन् ।
गत जेठ २ गते गठित कार्यदललाई असारको अन्तिममा विघटन गरिएको थियो । कार्यदलमा ओली पक्षबाट सुवासचन्द्र नेम्वाङ, विष्णु पौडेल, शंकर पोखरेल, विष्णु रिमाललगायतका नेताहरू थिए ।
ओलीले पार्टी केन्द्रीय कार्यालय थापाथलीमा कार्यदलका आफूनिकट नेताहरूलाई बोलाएर पार्टीको विवाद छिटो छिनोफानो गर्न निर्देशन दिएका हुन् ।
कार्यदलमा नेपाल पक्षबाट भीम रावल, सुरेन्द्र पाण्डे, गोकर्ण बिष्ट र योगेश भट्टराईलगायतका नेताहरू थिए । तर ओलीले आफूनिकट नेताहरूलाई मात्र ब्रिफिङ गरेका हुन् ।
‘पार्टीका कामहरू त्यसै बाँकी छन्, न आउनेहरूलाई कुरेर बस्नुको कुनै अर्थ छैन । तपाईंहरू त्यही तयारीमा लाग्नुहोस्,’ ओलीको भनाइ उदृत गर्दै एक नेताले सूत्रन्यूजसँग भने ।
यता माधवकुमार नेपाल पक्षका सांसदहरूले भने सरकारमा सहभागी हुनुपर्ने अडान राखेका छन् । यद्यपी पार्टी एकीकरणको ढोका बन्द नहुने गरी सबैको सल्लाह मानेर अघि बढ्ने नेता नेपालको भनाइ छ ।
गत फागुन २३ गते सर्वोच्च अदालतले तत्कालीन नेकपालाई विभाजन गर्दै एमाले र माओवादी केन्द्र ब्युँताएको थियो । त्यसयता नेता नेपाललगायतका अन्य नेताहरू एमालेमै फर्किएपनि समानान्तर गतिविधि कायमै राखेका छन् ।
प्रतिनिधि सभाको दोस्रो विघटन (जेठ ७ गते मध्यराति)पछि नेपाल पक्षका २३ सांसदहरू पुनःस्थापना र कांग्रेस सभापति शेरबहादुर देउवालाई प्रधानमन्त्री बनाउन परमादेश माग गर्दै अदालत पुगेका थिए ।
ओलीले बहुमतका आधारमा नेपाल समूहका नेताहरूलाई पटक-पटक कारवाही गर्दै आएका छन् भने कहिलेकाहीं आममाफी दिने कुरा पनि गर्ने गरेका छन् ।
ओली कमजोर भएको निष्कर्षका साथ नेपाल पछि हट्ने मनस्थितिमा भने छैनन् । उनले संसदीय दलमा बहुमत पुर्याउने र ओलीलाई हटाउने कसरत कायमै राखेका छन् ।
