दमौली–समुदायस्तरमा कोरोना संक्रमणको अवस्था पहिचान गर्न तनहुँका विभिन्न क्षेत्रका व्यक्तिको पिसिआर परीक्षण गरिएको छ। बढी मानिसको भीडभाड हुने कार्यालय, सुरक्षाकर्मी, सवारी चालक, ग्यारेज वर्कसप, बैंक तथा वित्तीय संस्था, कपाल काट्ने नाईलगायतको परीक्षण गरिएको जिल्ला स्वास्थ्य कार्यालयले जनाएको छ।

कार्यालय प्रमुख शंकरबाबु अधिकारीले आइतबार प्राप्त रिपोर्टअनुसार ८१ जनाको रिपोर्ट नेगेटिभ आएको जानकारी दिए। ‘समुदायस्तरमा कोरोना संक्रमणको अवस्था के छ भन्ने पहिचान गर्न प्रतिनिधिमूलक रुपमा स्वाब संकलन गरेर परीक्षण गरेका थियौँ’,उनले भने,‘सबैको रिपोर्ट नेगेटिभ आएको छ।’

जिल्लामा कोरोना परीक्षणका लागि करिब चार हजारको स्वाब संकलन गरी पिसिआर परीक्षण गरिएको छ। भारतलगायत तेस्रो मुलुकबाट आएर क्वारेन्टिनमा बसेका र कोरोना संक्रमित पुष्टि भएकाको सम्पर्कमा आएकासमेत गरी जिल्लामा तीन हजार ७६९ जनाको परीक्षण गरिएको जिल्ला स्वास्थ्य कार्यालयले जनाएको छ।

तीमध्ये तीन हजार २७० पुरुष र ४९९ महिला रहेको स्वास्थ्य कार्यालयले जनाएको छ। परीक्षण गरिएकामध्ये १८४ जनामा कोरोना संक्रमण पुष्टि भएको थियो।