तीन वर्षमै दोस्रो बन्यो डिस मिडिया, कुन कम्पनीको ग्राहक कति ?-Sutra News

तीन वर्षमै दोस्रो बन्यो डिस मिडिया, कुन कम्पनीको ग्राहक कति ?

सोमबार, २ पौस २०८०

काठमाडौं । स्थापनाको तीन वर्षमै डिस मिडिया नेटवर्क इन्टरनेट ग्राहक संख्याको हिसाबले दोस्रो बनेको छ । नेपाल दुरसञ्चार प्राधिकरणले सार्वजनिक गरेको तथ्यांकअनुसार २०७७ मा स्थापना भएको डिस मिडिया नेटवर्क इन्टरनेट प्रयोगकर्ताको संख्याका आधारमा दोस्रो ठूलो कम्पनी बनेको हो ।

गत भदौसम्मको तथ्यांकअनुसार डिस मिडिया नेटवर्कको इन्टरनेट प्रयोगकर्ताको संख्या ३ लाख १७ हजार नाघेको छ । जबकी २०७९ को भदौसम्म कम्पनीको इन्टरनेट प्रयोगकर्ताको संख्या १ लाख ५५ हजार थियो । कम्पनीले करिब दोब्बरले दरले संख्या बढाएको छ ।

प्राधिकरणले सार्वजनिक गरेको तथ्यांकअनुसार नेपालमा सबैभन्दा धेरै वर्ल्डलिन्क कम्युनिकेसनका इन्टरनेटका प्रयोगकर्ता छन् । भदौसम्मको तथ्यांकअनुसार वर्ल्डलिन्कका इन्टरनेट प्रयोगकर्ताको संख्या ८ लाख ११ हजार छ ।

योबीचमा सरकारी लगानीको नेपाल दुरसञ्चार कम्पनीको अवस्था भने निकै खस्किएको छ । २०७६ सम्म वल्र्डलिङ्कसँग प्रतिस्पर्धीको रुपमा देखिएको दुरसञ्चार त्यसयता सुस्ताएको छ । गत भदौसम्मको तथ्यांकअनुसार दुरसञ्चार कम्पनीको इन्टरनेट प्रयोगकर्ताको संख्या जम्मा २ लाख ९५ हजार छन् ।