बुधवार संस्थापनइतर पक्षको बैठकमा कांग्रेस वरिष्ठ नेता रामचन्द्र पौडेलले सहमतिका साथ सभापतिको उम्मेदवार चयन गर्न नसक्ने हो भने आफूले राजनीतिबाट सन्यास लिने बताए । उनी आँखाभरि आँसुसहित भावुक बन्दै महाधिवेशनमा पनि नजाने र कांग्रेस छोड्ने बताइरहँदा बाँकी नेताहरू अक्क न बक्क परेका थिए ।

पौडेलले भनेका थिए, ‘तपाईहरु कि आपसमा मिल्नोस्, कि मेरो नेतृत्व स्वीकार्न तयार हुनोस् । आफूहरु पनि नमिल्ने र अरुको नेतृत्व पनि नस्वीकार्ने हो भने मलाई राजनीतिबाटै सन्सास लिन दिनोस् ।’

प्रकाशमान सिंह र शेखर कोइराला दुवैले सभापतिमा दाबी नछोडेपछि पौडेलले रीस पनि पोखे, भावुक पनि भए । १३ औं महाधिवेशनमा सभापतिबाट पराजित भएका पौडेल १४ औं महाधिवेशनमा आफैं सभापति हुने आकांक्षा राखेका छन् । तर शुरूदेखि नै पौडेल डिफेन्सिभ थिए ।

आफ्नो समूहबाट साझा उम्मेदवार छान्न नसके एकपटक आफूलाई सहयोग गर्ने पौडेलले आग्रह गरिरहे । तर सिंह र कोइरालामा कुरा अड्किएको थियो । पौडेलले म सभापति हुन्न, तपाईंहरूले साझा उम्मेदवार ल्याउनुस भनिसकेका थिए । साझा उम्मेदवार चयन गर्न नसके आफूलाई सहयोग गर्न पौडेलले गरेको आग्रहलाई कतिपय नेताहरूले सकारात्मक रूपमा लिएपनि सिंहले अहिलेसम्म अडान छाडेका छैनन् ।

तर पौडेलको भावुकताले शेखर कोइरालाको मन भने छोयो । पौडेललाई सर्वसम्मतिमा उम्मेदवार बनाउने हो भने आफू मान्न तयार रहेको कोइरालाको भनाइ छ । सिंह भने पग्लिसकेका छैनन् । यता २ महिनाअघि नै सभापतिको उम्मेदवारी घोषणा गरेका विमलेन्द्र निधिले पनि पौडेललाई फोन गरेर साझा उम्मेदवार हुने हो भने सहयोग गर्ने बताइसकेका छन् ।

आज शुक्रवारबाट कांग्रेसको महाधिवेशन शुरू हुँदैछ । भृकुटीमण्डपमा उद्घाटन सत्र भर्खरै शुरू भएको छ । तर पौडेलले विज्ञप्ति जारी गरेर आफू महाधिवेशनमा उपस्थित नहुने संकेत देखाएपछि नेताहरू आत्तिए । पौडेलनिकट स्रोतले भन्यो, ‘सहमतिका साथ अघि बढ्न अन्य नेताहरू तयार नभए रामचन्द्र पौडेलले महाधिवेशनमा आफू जानुको कुनै अर्थ नरहेको बताउनुभएको छ ।’

पौडेल महाधिवेशनमै नआउने स्थिति बन्न थालेपछि नेताहरू दगुरेर पौडेलनिवास बोहोराटार पुगेका छन् । मिनेन्द्र रिजाल, महेश आचार्य, गगन थापा, अर्जुननरसिंह केसीलगायतका नेताहरू शुक्रवार बिहान बोहोराटार पुगेका थिए । सहमति नगर्ने हो भने राजनीतिबाट नै सन्यास लिन्छु भनेका पौडेललाई फकाउन नेताहरू पुगेका हुन् ।

स्रोतका अनुसार पौडेल विज्ञप्ति जारी नगर्न सहमत भएका छन् । तर अझैसम्म पनि पौडेल समूहले साझा उम्मेदवार तय गर्न सकेको छैन । ‘विभिन्न विकल्पमा छलफल भइरहेको छ, तर अझै सहमति जुटेको छैन,’ पौडेललाई भेट्न गएका एक नेताले सूत्रन्यूजसँग भने ।

यता पौडेललाई सर्वसम्मत उम्मेदवार बनाउनुपर्ने धार पनि शक्तिशाली हुँदै गएको छ । पौडेललाई नेता मान्न शेखर कोइराला तयार भएपछि सिंहलाई फकाउन अर्को टोली चाक्सीबारी पुगेको थियो । सिंहले आफ्नो परिवारले मात्र सधैं त्याग गर्न नसक्ने जवाफ दिन छाडेका छैनन् । तर अन्तिम अवस्थामा उम्मेदवारी फिर्ता लिने सम्भावना भने कायमै छ ।