नेकपा एकीकृत समाजवादीका अध्यक्ष माधवकुमार नेपालले सर्वोच्च अदालतमा देखिएको विवादको प्रमुख कारण एमाले अध्यक्ष केपी शर्मा ओली रहेको आरोप लगाएका छन् ।
बिहीवार कैलालीको धनागढी पुगेका अध्यक्ष नेपालले स्थानीय पत्रकारहरूसँग कुरा गर्दै ओलीले नै न्यायालयलाई निष्पक्ष ढंगले काम गर्न नदिएको आरोप लगाएका हुन् ।
‘यो बिगार्ने सबै केपी ओली नै हो, उनले न्यायपालिकालाई अनावश्यक लान्छना लगाएका छन् र हस्तक्षेपकारी भूमिका खेलेका छन्,’ अध्यक्ष नेपालले भने, उनले आफ्नो पक्षमा नभएका कसैलाई पनि देख्न सक्दैनन् ।’
उनले प्रधानन्यायाधीश चोलेन्द्रशमशेर जबरालाई महाभियोग लगाउने विषयमा सत्तारूढ गठबन्धनभित्र कुनै छलफल नभएको बताए ।
सर्वोच्च अदालतका १५ न्यायाधीशले इजलास बहिष्कार गरेपछि यतिबेला प्रधानन्यायाधीश जबरा तनावमा छन् । न्यायाधीशहरूको बैठकले उनको राजीनामालाई बटमलाइन बनाएका छन् ।
सत्तारूढ गठबन्धनमा भाग खोजेको भन्दै जबरामाथि महाभियोग लगाउनुपर्ने आवाजसमेत उठेको छ । तर जबराले भने आफू विधिसम्मत ढंगबाट प्रधानन्यायाधीश भएकाले विधिसम्मत ढंगबाटै बहिर्गमन हुने तर राजीनामा भने नदिने बताएका छन् ।
