नेकपा एमालेको जारी केन्द्रीय कमिटी बैठकमा उपमहासचिव घनश्याम भुसालले प्रतिनिधि सभा विघटनलाई असंवैधानिक भन्नुपर्ने प्रस्ताव मौखिक रूपमा पेश गरेका छन् ।
असोज १५ देखि १७ गते काठमाडौँमा हुने विधान महाधिवेशनको तयारीका लागि बसेको बैठकमा भुसालले प्रतिनिधि सभा विघटनलाई असंवैधानिक भनेर निर्णय गरे धेरै कुरा मिल्ने टिप्पणी गरेका हुन् ।
‘संसद विघटनलाई असंवैधानिक भनेर निर्णय गरौँ, यससँगै पार्टीभित्रका धेरै कुराहरू मिल्छन्,’ भुसालको भनाइ उदृत गर्दै एक केन्द्रीय कमिटी सदस्यले सूत्रन्यूजसँग भने ।
भुसालले प्रतिनिधि सभा विघटन मात्र होइन, जनताको बहुदलीय जनवादको पनि पुनःव्याख्या हुनुपर्ने माग राखेका छन् ।
आज ललितपुरको च्यासलस्थिति तुलसीलाल आमात्य स्मृति प्रतिष्ठानको भवनमा बसेको बैठकमा भुसालले ओलीको मौखिक धारणा आएपछि आफ्नो प्रस्ताव मौखिक रूपमै पेश गरेका हुन् ।
ओलीले यसअघि गरिएको दश बुँदे सम्झौता कार्यान्वयन गर्ने विषय पनि बैठकमा उठ्दै आएको छ ।
