घरि माओवादी केन्द्र, घरि एमालेमा रहेको दाबी गर्ने लुम्बिनी प्रदेश सभा सदस्य बिमलाकुमारी खत्री वली संसद किनबेचको एउटा महत्त्वपूर्ण उदाहरण बनेकी छन् । केही दिनअघि उनले एमालेमै रहेको वक्तव्य जारी गरेकी थिइन् भने त्यसको दुई दिनमै पत्रकार सम्मेलन गरेर आफूलाई मुख्यमन्त्री शंकर पोखरेलले बन्धक बनाएको आरोप लगाइन् ।
पत्रकार सम्मेलनमा उनले आफू उपचारका लागि नेपालगंज जाँदै गरेको बेलामा एमालेका मुख्य सचेतक भूमिश्वर ढकालले मुख्यमन्त्री कार्यालय पुर्याएर तीन दिनसम्म बन्धक बनाएको आरोप लगाइन् । उनले ट्वाइलेटको चप्पल लगाएर भाग्न सफल भएको र माओवादी केन्द्रको कार्यालयमा सम्पर्क गरेको बताइन् ।
तर के बास्तवमै उनलाई अपहरण गरेर बन्धक बनाइएको थियो त ? यसको स्वतन्त्र पुष्टि अहिलेसम्म भएको छैन । उनले आफूलाई बन्धक बनाइएको भन्दै पत्रकार सम्मेलनमा दाबी गरे पनि कहीं कतै उजुरबाजुर गरेकी छैनन् । मुख्य सचेतक ढकालले वलीले नै मुख्यमन्त्री पोखरेलसँग भेट गर्न आग्रह गरेको र आग्रह बमोजिम नै उनलाई मुख्यमन्त्री कार्यालय लगिएको स्पष्टिकरण दिइसकेका छन् ।
आफ्ना पति तथा सांसद उत्तरकुमार वलीको निधन भएपछि उपनिर्वाचनमा बिमला वली निर्वाचित भएकी थिइन् । उत्तरकुमार वली एमालेको टिकटबाट निर्वाचित भएका थिए भने बिमला तत्कालीन नेकपाको टिकटमा उम्मेदवार बनेर बिजयी भएकी थिइन् ।
उनलाई एमालेले आफ्नो सांसद भएको दाबी गरेको छ । तर उनले पहिलोपटक मुख्यमन्त्री पोखरेल विरुद्ध अविश्वासको प्रस्ताव दर्ता हुँदा आफू माओवादी केन्द्रमा रहेको बताएकी थिइन् ।
स्रोतका अनुसार उनी तानातानमा पर्नुमा ठूलो आर्थिक चलखेल भएको छ । ‘पहिला ५५ लाख लिएर उनले माओवादी केन्द्रमा जाने निर्णय गरेकी थिइन्, अहिले मुख्यमन्त्री पोखरेलसँग एक करोडको बार्गेनिङ गरेकी थिइन् । उनले माग गरेको रकममा पोखरेलले तीन दिनसम्म कुनै प्रतिक्रिया नजनाएपछि माओवादी केन्द्रको सम्पर्कमा पुगेकी हुन्,’ स्रोतले भन्यो ।
यसबारे माओवादी केन्द्रका नेताहरू केही बोल्न चाहन्नन् । उनलाई ५५ लाख दिइएको विषय पनि गोप्य नै छ । माओवादी केन्द्रका एक सांसदले सूत्रन्यूजसँग भने, ‘पैसा दिएर उनलाई यता ल्याइएको कुरा सरासर झुट हो ।’
तर बिमला वलीले आफूले पूर्व सभामुख तथा माओवादी नेतृ ओनसरी घर्ती र प्रदेश सांसद सुदर्शन बरालमार्फत ५५ लाख लिएको आफ्ना आफन्तलाई बताउने गरेको स्रोतको दाबी छ । आफू चुनाव लड्दा आर्थिक भारले थिचिएका कारण माओवादी केन्द्रसँग पैसा लिएको उनको दाबी छ ।
यद्यपि मुख्य सचेतक ढकालले उनलाई मुख्यमन्त्री पोखरेलसँग भेट्न र आर्थिक सहयोग माग्न उत्प्रेरित गरेका थिए । ‘मुख्यमन्त्रीसँगै कुरा गर्नुस् पैसाको, तपाईलाई कति चाहिएको हो, त्यही अनुसार कुरा गरौंला,’ मुख्य सचेतक ढकालले यही भनेर उनलाई मुख्यमन्त्री कार्यालयसम्म पुर्याएका थिए ।
तर करोड चाहिँ निकै धेरै भएको भन्दै पोखरेलले वलीको डिमाण्डलाई वास्ता गरेनन् । पोखरेल निवासमै रहँदा पनि उनले पटक-पटक माओवादी केन्द्रका नेताहरूसँग फोन सम्पर्क गरेकी थिइन् । ‘सायद उहाँलाई उतैबाट अझ बढी आर्थिक सहयोग गर्ने आश्वासन आयो होला र उतै जानुभयो,’ एमालेका एक सांसदले भने ।
उनी मुख्यमन्त्री कार्यालयमै रहँदा माओवादी केन्द्रनिकट ठेकेदार एकराज बस्नेतसँग कुराकानी गरेकी थिइन् । त्यसपछि उनको मन फेरिएको स्रोतको दाबी छ ।