बर्खास्त भएको पाचौं दिनमा पनि पूर्व माओवादी पृष्ठभूमिका सांसदहरूले मन्त्री क्वार्टर छाडेका छैनन् ।
सर्वोच्च अदालतले गत बिहीवार गैरसांसद रहेका मन्त्रीहरूको दोस्रो नियुक्ति संविधानसम्मत नभएको भन्दै ७ जनालाई मन्त्रीबाट बर्खास्त गरिदिएको थियो ।
बर्खास्तमा परेका सातै जनाले यो समाचार लेख्दासम्म पुल्चोकस्थित मन्त्री क्वार्टर छाडेका छैनन् ।
अदालतले रामबहादुर थापा ‘बादल’, लेखराज भट्ट, प्रभु शाह, गौरीशंकर चौधरी, टोपबहादुर रायमाझी, दाबा लामा र मणि थापालाई मन्त्रीबाट बर्खास्त गरिदिएको थियो ।
ललितपुरको पुल्चोकस्थित मन्त्री क्वार्टरको व्यवस्थापन हेर्ने जिम्मा लिएको शहरी विकास मन्त्रालय स्रोतले अहिलेसम्म ७ जनामध्ये कसैले क्वार्टर छोडेको जानकारी मन्त्रालयमा नआएको बतायो ।
‘अहिलेसम्म उहाँहरूले मन्त्री क्वार्टर छाडेको जानकारी आएको छैन,’ एक अधिकारीले भने ।
७ मध्ये कतिपय नेताहरू पुनः मन्त्री बन्ने लाइनमा देखिन्छन् । संसद विघटन भइसकेपछि गैरसांसद पनि मन्त्री बन्न सक्ने उनीहरूको दाबी छ ।
तीमध्ये एक पूर्वमन्त्रीका सहयोगीले भने, ‘जसपासँग कुरा नमिलेर मात्र हो, नत्र उहाँहरूकै पुनःनियुक्ति भइसक्ने थियो ।’
पूर्व गृहमन्त्री रामबहादुर थापा ‘बादल’का प्रेस संयोजक किरण भट्टराईले अहिलेसम्म बादलले क्वार्टर नछाडेको बताए । पुनः मन्त्री नियुक्त नभए बादल जोरपाटीस्थित आफ्नो निवास फर्किनेछन् ।
शहरी विकास मन्त्रालयबाट विदा भएका पूर्वमन्त्री प्रभु शाहका स्वकीय सचिव बालकृष्ण सापकोटाले पनि अहिलेसम्म शाहले क्वार्टर नछाडेको बताए ।
‘एक दुई दिनमा सर्नुहुन्छ होला,’ उनले भने ।
त्यस्तै मणि थापाका स्वकीय सचिव राजेन्द्र गौतमले पनि अहिलेसम्म थापाले क्वार्टर नछाडेको बताए । ‘अहिलेसम्म क्वार्टर छाड्नुभएको छैन,’ गौतमले भने, ‘छाडेपछि इमाडोलस्थित आफ्नै निवासमा सर्नुहुन्छ ।’
मन्त्री पदबाट बर्खास्त भएका दाबा लामा र गौरीशंकर चौधरीले पनि क्वार्टर छाडेका छैनन् । स्रोतका अनुसार उनीहरू आफ्नै घरमा बस्न थालेपनि सामान सारिएको छैन ।
मन्त्रालयका प्रवक्ता विष्णु प्रसाद शर्मा भने उनीहरूले क्वार्टर छोड्ने क्रममा रहेको दाबी गरे । ‘उहाँहरू मन्त्री क्वार्टर छोड्ने प्रकियामा हुनुहुन्छ । केही दिन त लागिहाल्छ नि !’ शर्माले सूत्रन्यूजसँग भने ।
टोपबहादुर रायमाझी र लेखराज भट्टले पनि अहिलेसम्म क्वार्टर नछाडेको स्रोतको दाबी छ ।
