नेकपा एमालेका प्रवक्ता प्रदीप ज्ञवालीले सत्तापक्ष आक्रामक ढंगले प्रस्तुत हुन थालेको टिप्पणी गरेका छन् । आज बसेको बैठकपछि सञ्चारकर्मीहरूसँग कुरा गर्दै प्रवक्ता ज्ञवालीले यस्तो अवस्थामा आफूहरू केही नगरी नबस्ने बताएका हुन् ।
एमालेकै माधवकुमार नेपाल पक्षले पार्टी पूर्ण रूपमा एक नभएसम्म कुनै गतिविधि नगर्न चेतावनी दिइरहेको सन्दर्भलाई कोट्याउँदै आफूहरू पार्टीको नियमित काम नरोक्ने बताएका हुन् ।
‘स्थानीय निर्वाचन आइसक्यो, सत्ता पक्ष आक्रामक ढंगले प्रस्तुत हुन थालिसक्यो,’ प्रवक्ता ज्ञवालीले भने, ‘यस्तो बेलामा पार्टीलाई कुनै गतिविधी गर्न नदिने काम एमालेको हीतमा हुन सक्दैन । पार्टीको काम चलिरहन्छ । एकता प्रयासका लागि भैरहेका छलफल अर्को ठाउँमा छ ।’
प्रवक्ता ज्ञवालीले अब बस्ने केन्द्रीय कमिटी बैठकले विधान संशोधन प्रस्ताव तयार गर्ने बताए । २०७१ सालमा बनेको एमालेको विधान समयानुकूल बनाउन संशोधन गर्न लागिएको ज्ञवालीको तर्क छ ।
