नेकपा एकताअघि (२०७५ साल जेठ २)को अवस्थामा पार्टीलाई फर्काउने सहमतिपछि केपी शर्मा ओली नेतृत्वकै एमालेमा रहेका भीम रावल, घनश्याम भुसाल, सुरेन्द्र पाण्डेलगायतका १० मध्यमार्गी नेताहरूलाई ओलीले निराश तुल्याइदिएका छन् ।
आइतवार ओलीनिवास बालकोटमा बसेको शीर्ष नेताहरूको बैठकमा ओलीले जेठ २ गतेको सांगठानिक संरचना हुबहु कार्यान्वयन गर्न नसकिने बताएका हुन् ।
गत असार २७ गते बसेको तत्कालीन १० सदस्यीय कार्यदलको बैठकले पार्टीलाई जेठ २ को स्थितिमा फर्काउने सहमति गरेको थियो । तर ओलीले त्यसलाई कार्यान्वयन गर्न अस्वीकार गरेका हुन् ।
नेता रावलले सहमतिबमोजिम आफूले सुदूरपश्चिमको पार्टी इन्चार्ज बनाउनुपर्ने माग राखेका थिए । ओलीले त्यसलाई अस्वीकार गरिदिए ।
बालकोट स्रोतले ओलीको भनाइ उदृत गर्दै सूत्रन्यूजसँग भन्यो – ‘लेखराज भट्टलाई हटाएर तपाईंलाई इन्चार्ज बनाउन सकिन्न । तपाईं पार्टीको उपाध्यक्षका रूपमा क्रियाशील हुनुहोस् ।’
लामो समय माधवकुमार नेपालसँग सहकार्य गरेका रावल अन्तिम अवस्थामा नेपाललाई छोडेर एमालेमै बसेका थिए । दश बुँदे सहमति हुबहु कार्यान्वयन हुने आशा गरेर ओली नेतृत्वकै एमालेमा बसेका मध्यमार्गी नेताहरू ओलीको एकलौटी शैलीबाट आजित भइसकेका छन् ।
ओलीले पूर्व माओवादी नेता लेखराज भट्टलाई सुदूरपश्चिमको इन्चार्ज बनाएका छन् भने रामबहादुर थापालाई बागमतीको इन्चार्ज बनाएका छन् ।
पुरानो सांगठानिक संरचनाअनुसार वागमती प्रदेशकी इन्चार्ज मुख्यमन्त्री अष्टलक्ष्मी शाक्य हुनुपर्ने हो । ओलीले थापालाई हटाउन चाहेका छैनन् ।
