काठमाडौं– अर्थमन्त्री विष्णुप्रसाद पौडेलले कोरोना भाइरस (कोभिड–१९) संक्रमण डरलाग्दो ढङ्गले फैलन सक्ने देखिएको बताएका छन् ।
सोमबार एक अन्तरक्रिया कार्यक्रममा बोल्दै अर्थमन्त्री पौडेलले नेपालमा कोभिड–१९ संक्रमणको दोस्रो लहर डरलाग्दो ढङ्गले फैलन सक्ने आकलन गरिएको बताएका हुन् ।
सोहीक्रममा मन्त्री पौडेलले भन्दै नागरिकको जीवन र जीविकाको रक्षा गर्ने विषय सरकारको पहिलो प्राथमिकतामा रहेको बताए । ‘कोभिडको दोस्रो लहर दुनियाँकै सामुन्नेमा चुनौतीको रुपमा देखा परेको छ, हामी कहाँ पनि यसको लहर डरलाग्दो ढङ्गले फैलन सक्ने आकलनहरू गरिएको छ ।’ उनले भने, ‘हामीले अब कोभिडबाट नागरिकको जीवन रक्षा गर्ने विषय र जीविकाको रक्षा गर्ने विषय यतिबेला राष्ट्रको सामुन्नेमा सर्वाधिक प्राथमिकताको विषय बन्न पुगेको छ । जीवनको रक्षा र जीविकाको रक्षा गर्दै हामीले आर्थिक, सामाजिक जीवनलाई पुरानै लयमा फर्काउने र गतिशिल बनाउँदै उन्नति, समृद्धिको यात्रा तय गर्ने विशिष्ट अवस्थामा छौं ।’
अर्थमन्त्री पौडेलले कसैले पनि लापरबाही गर्नु नहुने बताए । सरकारले सबै प्रकारका सम्भाव्य उपायहरू अवलम्बन गरेर कोभिड विरुद्धको लडाइँलाई जित्न चाहेको उल्लेख गर्दै उनले यसका निम्ति आम नागरिक र सबै संघसंस्थाहरूको सहयोग आवश्यक पर्ने बताए ।
