जनयुद्ध, जनआन्दोलनका सहिद तथा बेपत्ता परिवारका लागि निःशुल्क स्वास्थ्य बिमा गर्न सुरु गरिएको छ । दाङका स्थानीय सरकारहरूले निःशुल्क बिमाको नीति लिएर काम सुरु गरेका हुन् ।
पहिलो चरणमा घोराही उपमहानगरपालिको वडा नम्बर १४ र १७ मा स्वास्थ्य बिमाको काम सुरु भएको छ । आर्थिक वर्ष २०७८-०८९ मा यी वडाहरूले बजेट व्यवस्थापन गरी उनीहरूको स्वास्थ्य बिमा सुरु गरेको घोराही उपमहानगरपालिका-१४ का अध्यक्ष शक्तिराम डाँगीले जानकारी दिए ।
वडामा रहेका द्वन्द्वपीडितहरूको तथ्यांक संकलन गरी बिमा गराउने काम भइरहेको छ । वडा नम्बर १४ मा रहेका १८ घरपरिवारका करिब एक सयजनाको बिमा गर्ने काम अन्तिम चरणमा पुगेको अध्यक्ष डाँगीले बताए ।
वडा नम्बर १७ मा ३० घर परिवारका एक सय ५० जनाको विमा भइसकेको वडा नम्बर १७ का अध्यक्ष खुशीराम चौधरीले बताए । अन्य बाँकी भएका द्वन्द्वपीडितको तथ्यांक संकलन गर्ने कार्य वडाले जारी राखेका छन् ।
बिमा बनाउँदा पाँच परिवार बराबर तीन हजार पाँच सयका दरले रकम बुझाउनुपर्ने व्यवस्था छ । पाँचजना भन्दा माथि प्रतिव्यक्ति थपिए सात सयका दरले बिमा रकम थप्दै जानुपर्ने हुन्छ । बिमा गरेबापत बिमितहरूले वार्षिक एक लाख रुपैयाँ उपचार खर्च पाउने छन् ।
