काठमाडौं– सामुदायिक विद्यालय व्यवस्थापन समिति महासंघ नेपालले कोरोना महामारी र बन्दाबन्दीका कारण बन्द विद्यालय सञ्चालनको कार्यविधिमा व्यवस्थापन समितिको भूमिका स्पष्ट गर्न माग गरेको छ ।

महासंघका अध्यक्ष कृष्ण थापाले बिहीबार शिक्षा, विज्ञान तथा प्रविधि मन्त्रालयमातहतको शिक्षा विकास तथा मानव स्रोत केन्द्रलाई कार्यढाँचाबारे सुझाव दिँदै विद्यालय पुनः सञ्चालनका लागि स्थानीय सरकार र व्यवस्थापन समितिको सक्रिय भूमिका हुनुपर्ने आग्रह गरेका हुन् । 

विद्यालय पुनः सञ्चालनसम्बन्धी कार्यढाँचा २०७७ को मस्यौदामा सामुदायिक विद्यालयको प्रतिनिधिमूलक छाता संगठनको अगुवाइमा विद्यालय व्यवस्थापन समिति सक्रियता बढाइ विद्यार्थी, शिक्षक र कर्मचारीको स्वास्थ्य सुरक्षाको विधि अपनाउने गरी प्रबन्ध नगरिएकामा महासंघले ध्यानाकर्षण गराएको अध्यक्ष थापाले जानकारी दिए ।

महासंघले विद्यालय खोल्नुपूर्व अभिभावको परामर्शमा हाल विद्यालयमा स्थापना गरिएका क्वारेन्टिन र आइसोलेसनकक्ष निर्मलीकरण गर्ने, विद्यार्थी र शिक्षकको सुरक्षाको वैकल्पिक योजना र बजेटको व्यवस्था गर्ने, मनोसामाजिक सत्रहरु सञ्चालन गर्ने, विद्यालयमा स्यानिटाइजर र मास्कको व्यवस्था गर्दै प्राथमिक उपचारकक्ष स्थापनासमेत गराउन सुझाव दिएको छ ।

ती सबै कार्य भएको एक सातापछि मात्रै विद्यालय खोल्न सुझाव दिइएको छ । सरकारले आगामी भदौ ४ देखि विद्यालयमा भर्ना र भदौ १५ देखि कक्षा सञ्चालनको तयारी गरेको छ ।