काठमाडाैं । इरानका राष्ट्रपति इब्राहिम रायसी सवार हेलिकोप्टर दुर्घटनामा परेकाे छ । इरानको अर्ध सरकारी समाचार एजेन्सी मेहरले हेलिकोप्टर दुर्घटना परेकाे पुष्टि गरेकाे हाे ।
सञ्चार माध्यमले रेड क्रिसेन्टलाई उर्द्धत गर्दै जनाएअनुसार दुर्घटनामा राष्ट्रपतिसहित सवार सबैकाे मृत्यु भएकाे सम्भावना छ ।
जनाइएअनुसार राष्ट्रपति राईसीसँगै हेलिकप्टरमा रहेका विदेशमन्त्री हुसेन अमिरबदुल्लाहियानसहित नाै जना सवार थिए ।
हेलिकप्टरको भग्नावशेष अजरबैजानको पहाडमा भेटिएको सञ्चार माध्यमले जनाएका छन् ।
आइतबार साँझ करिब ७ बजेतिर अजरबैजान नजिकै हेलिकप्टर बेपत्ता भएको हो । रातभर खोजी भइरहेको थियो ।
उक्त क्षेत्रमा भारी वर्षा, कुहिरो र चिसोका कारण खोजीमा कठिनाइ भएको बताइएकाे छ । यस अवधिमा तीन उद्धारकर्मी पनि बेपत्ता भएका छन् ।
सञ्चार माध्यमका अनुसार हेलिकप्टरमा राष्ट्रपति रायसी र विदेशमन्त्री हुसेनसहित पूर्वी अजरबैजान प्रान्तका गभर्नर मलिक रहमाती, ताब्रिजका इमाम मोहम्मद अली अलेहाशेम, पाइलट, सहचालक, चालक दल प्रमुख, सुरक्षा प्रमुख र अंगरक्षक सवार थिए ।
