काठमाडौं । विकट जिल्ला मनाङ पुगेका चार विदेशी पर्यटकसहिच पाँच जना लेक लागेर बिरामी परेपछि उद्धार गरिएको छ । आज मनास्लु पदमार्गअन्तर्गत नासों गाउँपालिका ७ भिमताङबाट उनीहरुको उद्धार गरिएको हो ।
लार्केपास गइरहेका पाँच पर्यटकको उद्धार गरिएको प्रमुख जिल्ला अधिकारी सुवासकुमार लामिछानेले जानकारी दिए । उनका अनुसार भिमताङबाट हेलिकप्टरमार्फत पर्यटकको उद्धार गरिएको हो । चामेमा ल्याएर सामान्य उपचारपछि काठमाडौं ल्याइएको छ ।
साउथ अफ्रिकाका दुई, न्युजिल्याण्डका दुई र एक जना पथप्रदर्शकको उद्धार गरिएको प्रजिअ लामिछानेले जानकारी दिए । लेक लागेर पर्यटक बिरामी भएपछि हेलिकप्टरमार्फत उद्धार गरी उपचारका लागि लगिएको उनको भनाइ थियो ।
उनले भने, “तापक्रम नमिल्दा बिरामी पर्न सक्ने भएकाले पर्यटक सचेत भएर आउन मेरो आग्रह छ, यहाँको यात्रामा सवारी साधनको उपलब्धताको अभाव रहेकाले सचेतता अपनाउनु पर्छ ।”
प्रतिक्रिया दिनुहोस्
