काठमाडौं । साबिक विजेता नेपाल एसीसी प्रिमियर कपको सेमिफाइनलबाटै बाहिरिएको छ । शुक्रबारको खेलमा नेपाल यूएईसँग ६ विकेटले पराजित भएसँगै उपाधिको होडबाट बाहिरिएको हो ।
हारसँगै नेपालले आगामी वर्ष आयोजना हुने एसीसी एसिया कप खेल्ने सम्भावनासमेत टुंगिएको छ । ओमनको अल अमारतमा टस हारेर पहिला ब्याटिङ गरेको नेपालले निर्धारित ओभर खेल्दै ११९ रन मात्रै बनाएको थियो ।
आजको खेलमा सन्दीप जोराबाहेक कुनै पनि खेलाडीले राम्रो रन बनाउन सकेन । नेपालले केवल १२० रनको लक्ष्य दिन ९ विकेट गुमाएको थियो । नेपालका ८ ब्याट्सम्यानले दोहोरो अंकमा रन बनाउन नसक्दा यूएई हाबी भएको थियो ।
नेपालका लागि जोराले सर्वाधिक ५० रन जोडे । गुल्सन झाले २० र करण केसीले १७ रन बनाए । इनिङ्सको पहिलो बलमै कुशल भुर्तेल गोल्डेन डकआउट भए । रोहित पौडेलले १८ बलमा ५ रन जोडे । आसिफ शेखले ८ रन बनाउँदा कुशल मल्ल ३ र दीपेन्द्रसिंह ऐरी ५ रनमा आउट भए ।
यूएईका जुनैद खान, अलि नासिर र बासिल हमिदले २-२ तथा आयान अफजल खान, मुहम्मद फारुक र ओमिद सफि रहमानले एक–एक विकेट लिए ।
यूएईले १७.२ ओभरमा ४ विकेट गुमाएर लक्ष्य पूरा गरेको हो । ओपनर एलिसान सराफुले सर्वाधिक ५५ रन बनाउँदा विष्णु सुकुमारनले २८, आसिफ खानले १० र सेयद हैदरले १४ रन बनाए ।
नेपालका लागि गुल्सन झाले २ तथा ललित नारायण राजवंशी र सोमपाल कामीले एक-एक विकेट लिए । नेपालले गत वर्ष यूएईलाई नै हराएर एसिया कपमा पुगेको थियो ।
योसँगै टी २० विश्वकपपछि हुने एसिया कपमा भारत र पाकिस्तानसँग खेल्ने नेपालको सपना पनि समाप्त भएको हो ।
