काठमाडौं । बालबालिकाको गायनका लागि चर्चित रियालिटी शो द भ्वाइस किड्समा मिलन नेवार भित्रिएसँगै कोचहरूको समीकरण पूरा भएको छ ।
केही दिनअघि मात्र नयाँ कोचका रुपमा गायिका मेलिना राई र पप गायक छेवाङ लामा अनुबन्धित भएका थिए । उनीहरूको प्रवेशसँगै तेश्रो सिजनमा कोचमा परिवर्तन भएको खबर बाहिरिएको थियो ।
भ्वाइस अफ किड्सको दोश्रो सिजनमा प्रमोद खरेल, मिलन नेवार, सुशान्त केसी र प्रविशा अधिकारी कोचका रुपमा थिए । तीमध्ये प्रमोद खरेल यो सिजनमा पनि कोच रहने पक्का भएको थियो ।
हिमायल टेलिभिजनबाट प्रसारण हुने यो रियालिटि शोको प्रशारण आगामी महिनामा सुरु हुने बताइएको छ । ब्लाइण्ड अडिसनको छायांकन चाँडै सुरु हुने जानकारी दिँदै निर्देशक लक्ष्मण पौड्यालले अडिसनबाट ४८ जना छनोट हुने बताए ।
उनका अनुसार डिजिटल अडिसनमा ८–१० हजार जनाले भाग लिएका थिए । बालबालिकाका लागि ठूलो मानिने यो रियालिटी शोमा जोडिएर धेरै बालबालिका आफ्नो प्रतिभा प्रस्तुत गर्न चाहान्छन् ।
अघिल्लो सिजनमा टिम प्रमोदबाट स्पन्दन सुब्बाले भ्वाइसको ट्रफी उचाल्न सफल भएका थिए ।
