काठमाडौं । अफगानिस्तानमा बाढीका कारण ७० जनाको मृत्यु भएको छ । घटनामा ५० जनाभन्दा बढी घाइते भएको राष्ट्रिय विपद् अधिकारी मुल्लाह जानान स्याकले बताए ।
विगत छ दिनमा बाढीबाट प्रभावित भई मृत्युवरण गर्नेको संख्या ७० पुग्नुका साथै अन्य ५६ जना घाइते भएको स्याकले मिडियालाई जानकारी दिएका हुन् । यसअघि ती अधिकारीले ३३ जनाको मृत्यु भएको तथा २७ जना घाइते भएको पुष्टि गरेका थिए ।
गत हप्ता वर्षा र बाढीका कारण दुई हजार पाँच सयभन्दा बढी घर क्षतिग्रस्त हुँदा दुई हजारभन्दा बढी गाई वस्तुको मृत्यु भएको छ । अफगानिस्तानका ३४ वटा प्रान्तका प्रमुख भागमा शुक्रबारदेखि वर्षा र छिटपुट हिमपात भइरहेको छ ।
देशको मौसम निर्देशालयले आगामी चार दिनमा थप वर्षाको पूर्वानुमान गरेको छ ।
प्रतिक्रिया दिनुहोस्
