बागलुङ । जिल्लामा सोमबार साँझ भएको बस दुर्घटनामा ज्यान गुमाउनेको संख्या नौ पुगेको छ । पूर्वी रुकुमबाट काठमाडौंतर्फ प्रस्थान गरेको बागमती प्रदेश ०१–००६ ख ३८७९ नम्बरको बस बागलुङको निसीखोला गाउँपालिका ६ जाउलेपानीस्थित मध्यपहाडी लोकमार्गमा दुर्घटना भएको थियो ।
दुर्घटनामा २८ जना घाइते भएका छन् । घाइतेमध्ये एक जनाको बुर्तिबाङ प्राथमिक स्वास्थ्य केन्द्रमा उपचार भइरहेको र अन्य २७ जनालाई बागलुङस्थित धवलागिरि अस्पतालमा ल्याइएको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक मदन केसीले जानकारी दिए ।
दुर्घटनामा दाङका १८ वर्षीय लक्की पुनमगर, पश्चिम रुकुम मुसिकोट १ का २७ वर्षीया बिनिता केसी, रुकु मपश्चिम मुसिकोट नगरपालिका २ रातामाटाका सवारी धनी बबिददेल नेपाली, मुसिकोट नगरपालिका ४ सोलाबाङका ३५ वर्षीया टीका केसी, मुसिकोट नगरपालिका ३ साँखकी कल्पना केसी, रोल्पा घर भएका गाडी चालक सुवास गौतम भनिने मानसिंह विक, गोर्खा घर भएकी गीता थापा, ललितपुरका सुजन महर्जन र रुकुम पूर्व सिस्ने गाउँपालिका ५ रुमालबाराका २५ वर्षीय विक्रम परियारको मृत्यु भएको सूचना अधिकारी केसीले बताए ।
बस सडकबाट १५० मिटर तल खसेको थियो । सात जनाको घटना स्थलमै मृत्यु भएको र दुई जनाको बुर्तिबाङ प्राथमिक स्वास्थ्य केन्द्रमा उपचारका क्रममा मृत्यु भएको उनको भनाइ थियो ।
दुर्घटनामा ज्यान गुमाएका अधिकांश रुकुमका हुन् । घटना स्थलमै मृत्यु भएका सात जनाको शव सोमबार राति रुकुम पठाएको उनले बताए । दुई जनाको शव भने बुर्तिबाङ प्राथमिक स्वास्थ्य केन्द्रमै राखिएको छ ।
बुर्तिबाङमा सबै घाइतेको उपचार सम्भव नभएपछि धवलागिरि अस्पताल बागलुङमा ‘रेफर’ गरिएको थियो । दुर्घटनामा अधिकांश रुकुम पश्चिममा यात्रु घाइते भएका छन् ।
