काठमाडौं । नायिका पूजा शर्माको मुख्य भूमिका रहेको फिल्म ‘दान्भी’को तेस्रो चरणको छायांकन सुरु भएको छ ।
रुपेश तामाङको निर्देशनमा तयार भइरहेको ‘दान्भी’को तेस्रो सेड्यूलको छायांकन भारतको कालिम्पोङमा धमाधम भइरहेको हो ।
फिल्मको पहिलो हाफको दृश्यको छायांकन कालिम्पोङ भइरहेको निर्माणपक्षले जानकारी गराएको छ । छायांकनमा फिल्मका मुख्य कलाकारहरू पूजा शर्मा र कुन्साङ बोमजोमले दृश्य दिइरहेका छन् ।
एक सातादेखि कालिम्पोङमा रहेकी नायिका शर्माले भनिन्, ‘हामीले फिल्मको मुख्य अंशको छायांकन गरिरहेका छौँ । अझै, एक साता छायांकन सेड्यूल छ ।’
प्रदर्शन मिति तय नगरिएको यो फिल्मको निर्माणपक्षले केही समय अघि एक्सन पूर्ण टिजर समेत सार्वजनिक गरेको थियो । फिल्मको छायांकन सकेपछि मात्र प्रदर्शन मिति तय गर्ने तयारीमा निर्माणपक्ष छ ।
फिल्ममा पूजा र कुन्साङको साथमा फिल्म ‘पर्खी बसेँ तिमीलाई’का मुख्य नायक किरण श्रेष्ठको पनि अभिनय छ ।
देव मगर र अनुप गडालको लगानी रहेको यो फिल्मका कार्यकारी निर्माता पवन राना मगर हुन् । फिल्ममा कमला मल्ल, पन्चबहादुर तामाङ, श्रवण कुमार श्रेष्ठ र जीवन तामाङ सह-निर्माताको रूपमा छन् ।
श्री श्रेष्ठको एक्सन निर्देशन रहेको फिल्ममा हरि बहादुर घलेको छायांकन, रविना थापा मगरको कथा, सन्जोग कुँवर रानाको पटकथा तथा संवाद, अर्जुन पोखरेल, नरेश जोशी र केदार राज नेपालको संगीत, बन्दे प्रसादको सम्पादन, कविराज गहतराज र बाहुल बराइलीको कोरियोग्राफी छ । फिल्मका मुख्य सहाय निर्देशक नवराज शर्मा हुन् ।
