विश्व वातावरण दिवसको अवसरमा ५ जुन २०२२ को दिन प्रज्ञा प्रतिष्ठान, कमलादी, काठमाडौंमा माटो जोगाऔँ सम्वाद ‘माटो र म’ कार्यक्रमको आयोजना हुँदैछ । यस कार्यक्रममा अतिथि वक्ताको रुपमा राजेश हमाल (वरिष्ठ कालाकार), भवानी राणा (व्यवसायिक व्यक्तित्व, निवर्तमान अध्यक्ष नेपाल उद्योग वाणिज्य महासंघ) र डा. गोविन्द प्रसाद शर्मा (कृषि विभागमा कृषि तथा पशुन्छी विकास मन्त्रालयका सचिव) रहेका छन् । यो कार्यक्रमको सहजिकरण अनिल शाह (बैङ्कर) ले गर्नेछन् ।
वक्ताहरुले विशेष गरेर माटोको महत्व, अहिलेको माटोको अवस्था, माटो जोगाउन गर्न सकिने प्रयास र अभ्यास आदी बारेमा संवाद गर्नेछन् । माटो सबै कुुराको आधार भएकोले र वर्तमान विश्वमा माटोको विनाश तिव्र रुपमा भइरहेकोले यो संवाद कार्यक्रमको आवश्यक्ता महसुस गरीएको हो ।
मरुभूमिकण सामना गर्न गठित संयुक्त राष्ट्रसंघको सम्मेलन यूएनसीसीडीका अनुसार विश्वको ४० प्रतिशत माटो विनाश भइसकेको छ । विश्व खाद्य तथा कृषि सङ्गठन अनुसार विश्वको ५२५ खेती योग्य माटो नष्ट भइसकेको छ । संयुक्त राष्ट्र सङ्घले भनेअनुसार हामीसँग अबको केवल ६० वर्षको लागि माटो बचेको छ । यो महाविपत्तिको अवस्था हो । माटो विनाशका कारण खाद्य संकट, पानीको संकट, जलवायु परिवर्तन, जैविक विविधताको विनाश आदि हुने चेतावनी संयुक्त राष्ट्रसंघीय निकायहरुले दिइसकेका छन् ।
नेपाल कृषि प्रधान देश हो । यसकारण पनि माटो विनाश हाम्रो अर्थतन्त्र र जीविकोपार्जनको लागी ठूलो चुनौती हो । माटो जोगाऔँ सम्वाद ‘माटो र म’ कार्यक्रमको उद्धेश्य सकेसम्म धेरै मानिसमा माटो विनाशबारे जनचेतना जगाइ नेतृत्व तहसम्म यो विषय पुगोस् र माटो सम्बन्धी प्रभावकारी राष्ट्रीय नीति बनोस् भन्ने हो । यो कार्यक्रम सदगुरुद्वारा सुरु गरीएको विश्वव्यापि माटो जोगाऔँ अभियानप्रति ऐक्यबद्धता हो । कार्यक्रममा सहभागी हुनको लागि निःशुल्क रेजिष्टर गर्न सकिनेछ ।
माटो जोगाऔँ विश्वव्यापी अभियान हो, जसले हाम्रो माटो र धरती जोगाउनको लागि जागरूक दृष्टिकोणसहित काम गर्न प्रोत्साहन गर्दछ । सर्वप्रथम, यो जन–अभियान हो । यस अभियानले विश्वभरिबाट ३.५ अर्ब मानिसहरू (विश्वभरिका ६० प्रतिशत मतदाताहरू)को समर्थन जुटाउने अनि माटोलाई पुनः जीवन्त पार्न र माटोको विनाश रोक्नको लागि नीतिगत कार्यहरू शुरु गर्न विश्वभरिका सरकारहरूलाई सघाउने उद्देश्य लिएको ।
विश्वका नेतृत्वकर्ताहरू, प्रभावशाली व्यक्तिहरू, कलाकारहरू, विज्ञहरू, किसानहरू, आध्यात्मिक गुरुहरू, गैर सरकारी संस्थाहरू अनि नागरिकहरूले अभियानको समर्थनमा आवाज उठाइरहेका छन्, ताकि मानवजाति र माटोबिच रहेको सम्बन्धलाई पुनः स्थापित गर्न सकियोस् ।
