काठमाडौं । प्रमुख प्रतिपक्षी दल नेकपा माओवादी केन्द्र जनतासँग माओवादी–मध्यपहाडी लोकमार्ग जनजागरण अभियान रुकुमपूर्व पुगेको छ। अध्यक्ष पुष्पकमल दाहाल प्रचण्डसहितका नेताहरू उक्त अभियानमा सहभागी छन्।
अभियानकै क्रममा ठाउँ-ठाउँमा जनसंवाद नाम दिएर माओवादीले कार्यक्रम पनि गरिरहेको छ। उक्त कार्यक्रमलाई प्रचण्डसहित केही सीमित शीर्ष नेताले मात्रै सम्बोधन गरेका छन्।
शीर्ष नेता सहभागी भएका प्रायःसबै ठाउँमा पार्टी प्रवेश कार्यक्रम पनि राखिएको छ। आज रुकुमपूर्वमा पनि उक्त कार्यक्रम राखिएको थियो। रुकुमपूर्वमा नेपाल समाजवादी पार्टी (नयाँ शक्ति)को सिंगो पार्टी नै माओवादी केन्द्रमा समाहित भएको दाबी गरिएको छ।
माओवादीका अनुसार जनमुक्ति सेनाका पूर्व कमान्डर तथा नेसपाका पूर्व केन्द्रीय सदस्य जितमान पुन ‘मार्सल’सहित डा।बाबुराम भट्टराई नेतृत्वको नेसपा नयाँ शक्तिको सिंगो कमिटी माओवादीमा समाहित भएको हो। साथै नेकपा (एमाले) निकट दलित मोर्चाका जिल्ला अध्यक्ष उपेन्द्रलाल कामी पनि माओवादी प्रवेश गरेका छन्।
अध्यक्ष प्रचण्डले पार्टीमा प्रवेश गरेका नेताहरूलाई स्वागत गर्दै परिवर्तनको आन्दोलनमा पुनः जुट्न आग्रह गरे।
