काठमाडौं । सर्वोच्च अदालतले अर्थशास्त्री प्रा.डा विश्व पौडेलविरुद्ध पेस भएको रिट निवेदन दर्ता गर्न अस्वीकार गर्ने अदालत प्रशासनको आदेशलाई सदर गरेको छ । न्यायाधीश सपना प्रधान मल्लको इजलासले सर्वोच्चका रजिस्ट्रार भद्रकाली पोखरेलले गरेको दरपीठ आदेशलाई सदर गर्ने आदेश दिएकाे हाे ।
अधिवक्ताहरू प्रतिभा उप्रेती र विशाल थापाले पौडेललाई गभर्नरमा नियुक्त गर्न नहुने भन्दै रिट दिएका थिए। तर, सो रिटमा रजिस्ट्रार पोखरेलले बेरीतको भन्दै दरपीठको आदेश गरेका थिए।
त्यसविरूद्ध निवेदकहरूले पुनः गत शुक्रबार अर्को निवेदन दिए । आइतबार दर्ता भएको दरपीठविरुद्धको सो निवेदनमाथि मंगलबार सुनुवाइ भएको हो।
अदालतकाे आदेशसँगै पौडेललाई गभर्नर नियुक्ति गर्न बाटाे सहज भएकाे छ ।
तर, नियुक्तिपछि उनको योग्यता र अरु प्रश्न उठाई आगामी दिनमा रिट निवेदन दर्ता हुने सम्भावना भने टरिसकेको छैन ।
अहिलेसम्मको सहमतिलाई हेर्दा, पौडेल गभर्नरमा नियुक्त हुने सम्भावना अधिक छ । मंगलबार बिहान प्रधानमन्त्री केपी शर्मा ओली र कांग्रेस सभापति शेरबहादुर देउवाबिच भएको सहमतिअनुसार नै गभर्नर सिफारिस समितिको बैठक बोलाउँदै मन्त्रिपरिषद्को बैठक बोलाइएको छ । जुन बैठकबाट पौडेलको नाममा निर्णय हुने सम्भावना छ ।
