काठमाडौं । जेठ महिनाका लागि वाणिज्य बैंकहरुले ब्याजदरको नयाँ सूची सार्वजनिक गरेका छन् । नयाँ महिना लाग्नुभन्दा अघि नै ब्याजदर निर्धारण गर्नुपर्ने व्यवस्था बमोजिम वाणिज्य बैंकहरुको जेठको लागि ब्याजदरको सूची सार्वजनिक गरेका हुन् ।
सार्वजनिक सूचीअनुसार व्यक्तिगत मुद्दतीमा केही वाणिज्य बैंकले बढाएका छन्, केहीले घटाएका छन् भने अधिकांशको स्थिर छ ।
तीन वाणिज्य बैंक सानिमा, एभरेष्ट र नेपाल बैंकले वैशाखको तुलनामा ब्याजदरमा सामान्य वृद्धि गरेका छन् । तीन वाणिज्य बैंक मेगा, कुमारी र सिद्धार्थले भने सामान्य घटाएका छन् । सार्वजनिक ब्याजदरको सूचीअनुसार १४ वाणिज्य बैंकले भने वैशाखकै ब्याजदरलाई कायम राखेका छन् ।
समग्रमा बैंकहरुले व्यक्तिगत मुद्दतीमा दिने औसत ब्याजदर भने घटेको छ । वैशाख महिनामा व्यक्तिगत मुद्दतीको औसत ब्याजदर ५.९७९ प्रतिशत रहेकोमा जेठ महिनामा ५.९५२ प्रतिशतमा झरेको हो ।
नयाँ ब्याजदरअनुसार जेठ महिनामा व्यक्तिगत मुद्दती निक्षेपमा सबैभन्दा न्यून ब्याजदर नेपाल बैंकले ५.४५ प्रतिशत तोकेको छ भने सबैभन्दा धेरै ब्याजदर एभरेस्टले ६.६४ प्रतिशत तोकेको छ ।
व्यक्तिगत मुद्दतीतर्फ कुनको ब्याजदर कति ?
नेपाल बैंक : ५.४५
एसबीआई : ५.५
हिमालयन : ५.५
इन्भेस्टमेन्ट मेगा : ५.५
कृषि विकास : ५.५१
सिटिजन्स : ५.६५
लक्ष्मी सनराइज : ५.७५
नबिल : ५.७५
सिद्धार्थ : ५.७५
कुमारी : ५.९१
ग्लोबल आईएमई : ६
माछापुच्छ्रे : ६
राष्ट्रिय वाणिज्य : ६
प्रभु : ६.१
प्राइम कमर्सियल : ६.२५
स्टान्डर्ड चार्टर्ड : ६.२५
सानिमा : ६.३३
एनएमबी : ६.६
एनआईसी एसिया : ६.६
एभरेस्ट : ६.६४
