काठमाडौं । आईसीसी पुरुष क्रिकेट विश्वकप लिग–२ अन्तर्गत अहिले नेपाल र यूएईबीचको खेल भइरहेको छ । कीर्तिपुरस्थित त्रिवि क्रिकेट मैदानमा घरेलु टोली नेपाल र पाहुना टोली यूएईबीच भइरहेको हो ।
लिगको अन्तिम खेल भएकाले खेलाडीलाई हौसला दिन प्रधानमन्त्री पुष्पकमल दाहाल प्रचण्ड क्रिकेट मैदानमा पुगेका छन् । यूएईले टस जितेर ब्याटिङ गरेको छ । खेलमा अहिले युएईको अर्को विकेट गुमेको छ । दीपेन्द्र सिंह ऐरीको बलमा ठूलो शट खेल्ने चक्करमा यूएईका आयन खान लङ अनतर्फ बाउन्ड्रिमा क्याचआउट भए ।
गुल्सनले क्याच लिएका हुन् ।त्यसअघि भिम सार्कीको थ्रोमा आशिफले रन आउटको रुपमा तेस्रो विकेटको पतन गराउन सफल भएका थिए । युएईका पूर्वकप्तान सिपी रिजवान ७ रनमा रन आउट भए। यसअघि सन्दीप र ललितनारायणले विकेट लिएका थिए।
यूएईसँग हारेमा नेपालले यसै महिनाको अन्तिममा नामिबियामा हुने क्वालिफायर प्लेअफ खेल्नुपर्ने हुन्छ। नेपाल पराजित भएमा नामिबिया सोझै विश्व कप छनोटमा पुग्नेछ।
नेपाल र यूएईबीच अहिलेसम्म १२ एकदिवसीय खेल भएको छ। जसमा समान छ खेलमा जित र हार छ। नेपालले पछिल्ला दुवै खेलमा यूएईलाई हराएको छ।
प्रतिक्रिया